Minggu, 21 Oktober 2018

RATOK CARANO USANG
(Rindu kabakeh Siriah Langkok)
dangalah Ratok carano usang
dalam lamari sajo talatak
Rindu kabakeh Siriah jo pinang
babungkuih rancak kain dulamak

balangkok langkok dalam carano
dulu basanjuang kato sambah
dilingkuang duduak urang basamo
sabalun siriah urang kunyah

Dalam sambah balewakan
kajadi simbol pacahnyo alek
dikato sidang jo pamohonan
mamapek cupak nan lah tabuek

Hijau nyo siriah baraso padeh
Kuniangnyo pinang bialah kalek
dalam carano kasiah ba uleh
indak kamungkin balapeh kabek

Gambia nan Coklat bialah paik
sadah nan Putiah taraso masin
didaun siriah arek balilik
bacarai raso indak kamungkin

Siriah pinang gambia jo sadah
Hijau Kuniang coklat jo putiah
asa Tacapai di Rono Sirah
disinan mangko kandak kabuliah

Mako dilicak siriah jo pinang
dipalik sadah sarato gambia
di dalam muluik samo baranang
elok kajadi pamerah bibia

sarinyo naiak paroman diri
lamaknyo tingga dirangkuangan
ganti ambalau baso-basi
silaturahimandai jo tolan

kok luluah bana di kunyah urang
ayia nan ado samo dilulua
manjadi sampah nan urang buang
lah raso sampai sagalo kawua

bia bacarai siriah jo tampuak
hijau nan indak babaliak lai
pado di tabiang tagayuik lapuak
kuniang di sangai dek mato ari

indak babaliak kuniang ka pinang
Haram manjadi upek caraco
padonyo busuak badan di batang
manjadi sarok ditapi rimbo

Gambia kok indak coklat lai
Sadah bacarai nan jo putiahnyo
asa tacapai cito nagari
palangkok jujuang dalam carano

Sajak baputa putaran maso
Budayo mulo di asak urang
lah tipih agak jo raso raso
kieh nan indak lai mambayang

harato labiah paguno kini
budayo cando lah ilang makna
hilang budayo baso jo basi
pitih lah acok kini panuka

bacarai siriah jo carano
gambia lah putuih kasiah jo pinang
sadah lah mabuak maratok ibo
adaik lah abih di asak urang

carano indak paguno lai
kini lah larek nan jo kuniangnyo
kusam takuruang dalam lamari
bakawan loyang jo piriang kanso

rindu kabakeh siriah salangkok
batutuik Rancak kain Dulamak
kini manjadi buahnyo ratok
manunggu maso lapuak talatak....

Rabu, 17 Oktober 2018

MASO TIBO JANJIAN SAMPAI.
(Dahsyatnyo Sakaratul Maut..)

Tabujua rago tangah rumah
rabah di ateh dipan kayu
sakujua badan taraso lamah
umpamo daun nan mulo layu
tak lai dapek di ubek
panawa tak mangkuih lai
bamacam ubek nan lakek
manulak darah di nadi
tibo sudah maso janjian
Akhia Hiduik didunia nanko
Aruah lah nyato kabajalan
manunggu datang pancabuik nyao
Ratok tangih urang disayang
isak rarau anak tacinto
indak ciek kamahalang
kutiko pisah badan jo nyao
Lai bana harato banyak
sawah laweh parak manjadi
santano Allah lah bakaahandak
sadatiak indak dapek di bali
Sakaratul maut lah tibo
Aruah di bacuik dari badan
raso sakik Usah di baco
indak tabayang dalam pikiran
Padiah bajalan kaurek nadi
satiok alia darah bajalan
ngilu mambaluik tiok sandi
manjala kasaluruah badan
Urek syaraf di enjo enjo
rangguik kuek barundehkan
dari kaki sampai kapalo
sampai ka ujuang jari tangan
Putuih sudah Pita suaro
bak urek lihia kanai potoang
Tak ado lai dayo Upayo
Pakiak ratok mamintak toloang
kaki tangan malajang lajang
maampeh ampeh di ateh kasua
mancaliak jo manarawang
sibola mato raso tabudua
bibia di elo kabulakang
lidah lah cando kanai rangguik
mulo takuak kaduo rahang
indak kuaso lai manutuik
Hanyo tasiso languah singkek
Tak kalo nyao bapisah sudah
Malaikat maut lah ma angkek
nyao babaliak kapado ALLAH
Tatutuik sudah Pintu taubaik
abih wakatu mintak ampun
takkalo nyao dibaok malaikaik
aruah dibadan putih dirantun
Kini tak ado lai Kuaso
Taampeh badan tagolek diri
tak ado lai kini tasiso
salain bangkai tagolek mati
Tutuik Buku tamat curito
kisah hiduik di ateh dunia
balanjuik hiduik dalam pusaro
manunggu waktu dunia barakhia
"inalillahi wainailaihi rojiun............."
Dahsyat nyo sakaratul maut
satiok kito kamarasokan
dari manusia indak kaluput
ateh banamo kehidupan
sananglah urang ba iman
mamacik taguah paham agamo
sakik tarakhir nan di rasokan
sabalun mangicok nikmat sarugo
nan korupsi baok banalah
pamimpin zalim tarimo baleh
urang nan suko mamacah balah
atau ka rakyat sanang manindeh
Katando Jadi Jo uang Muko
tangguanglah azab di alam barzah
untuak insan panuah jo doso
manunggu maso dunia punah.........

(Yovi Ottera)

Selasa, 16 Oktober 2018

SETEREEH DEN....
(Ulah apak mintak 2 priode)
*************
Zaman SUKARNO Kok di baco
sadang ma unjua unjua kaki
duduak manunggu di sarugo
manunggu antri lahia kabumi
Diukua ukua di jangko jangko
mangko tabilang dalam hati
Ambo Lahia di Zaman SUHARTO
Tumbuah Diera apak HaBIEBIE,
antah mangutuak antah basukur
tumbuah babilang cando kini
Aka tibo dizaman GUSDUR,,
Gadang saatnyo MEGAWATI
tamanuang ambo wakatu sore
sambia mamandang langik tinggi
Cadiak dimaso Bapak SBY,,
setress lah tibo nan diJOKO WI
Suliknyo badan cari karajo
ijazah jadi pambungkuih bawang
ta injak lobi pabrik rang cino
Ratok Ba irik di bao Pulang
Tungku di dapua acok ma upek
pariuak tempuih indak tajarang
Mie barandam jo ayia angek
acok kajadi makan siang
Asinnyo Lawuik bajua Maha
Lah amba randang sarato gulai
Urang rumah lah ilang aka
pitih balanjo nan indak sampai
Jawi jo kabau mabuak cimburu
Manunggu gaek badan di kandang
dagiang Impor nagari kangguru
Hidangan samba di alek gadang
Galang batuka nan jo timbago
dek urang rumah itu di pasang
mahanyo bana ameh sakilo
dek tambang ameh lapeh ka urang
Baju Impor label tapasang
dek rono Rancak bakilek kilek
takicuah badan di nan tarang
kironyo jaik nak rang Piangkek
Stress indak sumbarang setress
setress dek ulah apak joko
lah jo ayia dingin kaniang ba kompres
di hujan labek bakipeh juo
dilumbuang Ayam Marasai
Mati takangkang indak makan
sio sio manjadi bangkai
ka lawuik gadang urang ambuang kan
Bapusaro badan Tak mungkin
Tanah kuburan kini lah langka
kadang balapih jo palangkin
tampek malinteh oto nan maha
Di Era Siaa badan kamati.
dimaso sia mayik bakubuang
nyampang batambuah maso Jokowi
lah nyato ratok ka Basambuang
keoang jo cipuik lah puntang pantiang
mandanga apak dalam badendang
pangganti ayam sarato dagiang
mangko manguruak si kalang kalang
mato kini bakunang kunang
pangana bana lah acok sasek
mancaliak pantau sangko garundang
bingkaruang alah sabantuak koncek
ma onjak onjak di tangah simpang
sionjak karo kanai jilatang
badan lah mulo tagalak sorang
mancaliak plastik asoy nan tabang
Apak Prabowo toloanglah ambo
salamaikkan bana sisonyo umua
lah indak talok bak cando iko
angok lah barek ma iruik ingua....
#plisss deh pak...mambana wak aaa...sabana gilo wak lai aahh....alah ciek priode mah...
(Yopi Samparono Kayo)

Senin, 15 Oktober 2018


AYIA LAH JADI BUAH PIKIA
( Ratok basaok Salimuik Basah)
oo hujan taduah lah baa
baoklah gabak kalawuik gadang
lah binguang kami bakisa
tiok malangkah ayia taganang

antah kok manga di ateh langik
baiko bana tirih kabumi
di sangko lai rinai jo sangik
malahnyo hujan bajadi jadi

Hujan jo badai lah basiarak
taajan banci ka awan hitam
bumi juo mandapek dampak
batubi tubi hujan mandaram

Langik sabak awan manggalok
Guruah jo patuih basangketo
Gabak di hulu nan maratok
Kampuang tarandam dek ayia mato

marusuah gabah didalam rangkiang
musim pobilo manjadi bareh
biak jo lambok tak kunjuang kariang
saminggu tido batamu paneh

busuak mananti si cindua sagu
ampiang tamanuang dalam belek
karambia cemeh di ateh pagu
di agah dantuang patuih jo kilek

bakacamuak hujan jo badai
sa kacamuak rusuah di hati
raso ka niat indak kasampai
manggantuang cito kamatoari

alun lai kariang sibatang padi
diguyua hujan samalam suntuak
manga baulang di pagi hari
padi talampok lah mulo busuak

dangalah ratok gonjoang tinggi
latiah manahan ijuak basah
santano sandi tak tahan lai
namuah maraok taban kabawah

di ateh puncak sigunuang padang
kabuik manatok ombak tibo
sampan lah mabuak dek ayia pasang
manga kok ombak batundo juo

kelok sitinjau diam tamanuang
bukik indaruang paneh manahan
longsor kok lapeh dari gunuang
takubua kampuang indak banisan

lubuak minturun di ginyang cameh
batang kuranji latiah bapikia
nyampang galodo tibo malinteh
anyuiklah ranah sampai ka hilia

gabak di langik jo awan hitam
cukuiklah sudah nan samantaro
antah baniat handak marandam
batambuah ratok ranah pusako.


Ditulih pantun ba ulang ulang
Kaganti surek nan bakirimi
Ka langik lai dapek batenggang
Bakurang juo cameh dibumi

Antah sampai antah kok indak
batimbang ragu didalam hati
pakiak lah parau suaro sarak
tagih bagumam dalam hati

Tapi tasasak padang karimbo
Tenggang lah abih jo kalaka
Kok indak ubek, jadilah tubo
Pado manangguang cando iko bana.
(Yovi Ottera)
(PAHAM NAN TAGALICIAK)
Pandang jo caliak sapinteh lalu
Lah banyak paham nan tabaliak
dalam baraja lah banyak ragu
Niat tak kunjuang batuka baiak

Sadang baguru kapalang aja
Lai bak bungo kambang tak jadi
kunun kok dapek dari mandanga
Didalam indak bapilah lai

Karuak nan indak sahabih gauang
Ma awai indak sahabih raso
Banyak paham nan indak langsuang
Tuka mukasuik jo tujuannyo

Katiko langik basintak naiak
Samaso bumi mahatam taban
basangketo buruak jo baiak
sampai kaakhia putaran zaman

tagak di ateh bajujuang bana
tagak di bawah balantai salah
paneh marantang nan jo mangaka
nan kuek juo indak tasanggah

ibaraik undang maso dahulu
hukum banamo silamo lamo
babana karuek tinju
aka kok lai ba bana tido

Batareh abih kaampu kaki
basasi pijak kaujuang tapak
Indaklah paham hiduik ka mati
awak maraso nan paliang bagak

nan kareh abih dimakan takiak
kok lunak lindeh makanan sudu
tak ado tanyo nan jo salidiak
tabalitang patah tabujua lalu

Kok ado bana batang malintang
dikarek abih dikabuang-kabuang
diputuih pendek dikuduang pajang
dari pangka sampai ka ujuang

Bakcando dahan nyampang maambek
elok dikupak dipatah tigo
tasangkuik langkah dirantiang ketek
namuah di rundeh bapatah duo

tasuo runciang nan manyucuak
dipumpun abih satantang ujuang
tangan baladiang lah main pakuak
mamacik kapak lah main kabuang

Dinan tinggi timpo manimpo
santano gadang enda maenda
nyampang kok kuat elo ma elo
cadiak bamain jo kato duto

Arih nan indak lai basuo
adia nan indak lai samo barek
kurang maagak jo kiro kiro
baitu hukum kini diliek

Hitam jo putiah lah basangketo
Maradang galak sarato bangih
kadang nan salah lah bakuaso
nan batuak acok takikih abih

ambo nan indak cadiak pandai
Hanyo mancaliak kurun wakatu
Pituah guru dipaberai
Manjadi paham nan jo ulemu

santano batua tagak dibana
kok salah usah dibimbiang lapeh
ingek akhiraik iduik di dunia
jo azab tuhan tumbuahkan cameh........
(Yovi Ottera)
RATOK GADIH SUMANIK 

Iko curito Upiak Sumanik
tingga di kampuang balingkuang bukik
rajin sumbayang karumah sajik
tutua bahaso rancak taratik

sajaknyo iduik lah mulo sarik
padi di sawah abih dek mancik
lado lah layua dilereng bukik
mandehpun acok basakik sakik

mulailah Upiak ko turun Bukik.
Manjua baju di Toko Butik
Bakawan jo anak bukik Apik
Buliah di kecek an Kurang taratik

Pulang karajo nan dari butik
manjalang masuak waktu mugarik
basamo kawan rang bukik apik
acok dibaok raun sabalik

sumbayang kini indak talakik
dek kesibukan wakatu sampik
lah mulo puda ahklak tadidik
taraso lamak ba asik asik

tagoda gaya trendi rang AmRik
Babaju kensi sirawa sampik
tambah karajo pulo di butik
tantulah baju dapek di kridik

Lah mulo lupo kampuang sumanik
lah senteng orok dulu satumik
Karuduang kini taraso sampik
Rambuik digerai ba ieh sapik

Dulu banamo Upiak sumanik
Kini batuka jo Shinta Monik
basalin rupo bantuak di klinik
babayia maha operasi plastik

Bibia lah merah Ba lepong sitik
badak lah rutin mandompol kulik
baminyak arum baun manyangik
sipatu ringgi manjungkik jungkik

Pacar. jo toke juragan batik
satangah bayo bamato sipik
tagoda bana dek wajah cantik
manebar rayu goda simpatik

Di ateh onda bakapik kapik
didalam oto basampik sampik
jalan di balai bapacik pacik
lah cando baruak bagayuik gayuik

lupo lah sudah gema musajik
lah acok duduak nan didiskotik
bakawan putau jo jarum suntik
pulang lah masuak sang fajar tabik

ulah rayuan setan mugarik
ditambah iduik bana lah panik
lah sanang bana dipacik pacik
pasrah jo namuah di tuncik tuncik

babilang maso waktu mairik
paruik lah acok mual malilik
babali testi nan di apotik
lah nyato kini badanlah buncik

Urang disayang mancari lilik
mulai batingkah nan jo manampik
sapantun bana bujang munapik
lari mahilang ka ujuang langik

tapacak paluah Upiak sumanik
didaro cameh sarato panik
tak ado lai tampek bapacik
kamano tampek palarai sakik

Si ayia mato jatuah kakulik
tangan marosok paruik nan buncik
jikok babaliak nan kasumanik
jadi gunjiangan urang sabalik

lah pakau utak sabana panik
setan lah galak takikik kikik
aka nan sehat kini ta impik
samakin arek doso mambalik

Nyao barakhia di ujuang sabik
di urek nadi darah malancik
mati didalam kamar nan sampik
basimbah darah atek keramik

Baok lah doso oii Upiak sumanik
didalam ujuik manjadi mayik
lalok tabujua di kubua sampik
ateh jo sampiang tanah maapik

Dalam narako Akau di tuncik
kekal didalam ndak bangkik bangkik
azabnyo kubua padiah jo sakik
itulah buah nan Akau petik

dek ulah nikmat nan sakicik
bajua norma nan jo taratik
tuntutan iduik payah jo sulik
bataruah atah kapado mancik....

(Yovi Ottera)

MINANGKABAU BAPAYUANG GABAK
(Anyuik tarandam Tapian Mandi)
Antah Apo bantuak sangketo
nan tajadi dilangik gadang
sampai badai bakcando iko
nyo lajang laweh ranah minang

Dari tinggi ranahnyo darek
Sampai pasisia tanah rantau
Minang di daro hujan labek
Digayuang kareh bubu langkisau

kota padang mulo tarandam
matilah langkah kadibao
caliak barito mangkin mandamam
saputa lingkuang ranah pusako

basiginyang tacurah hujan
Ranah pasaman Takajuik cameh
banjir gadang lah ba antakan
ma irik apo sajo malinteh

maurai maratok gunuang pasaman
tangih jo isak timpo batimpo
manyauik rarau di pariaman
parik malintang taganang pulo

Pasisia salatan sato taganang
Nagari kambang gabak ma intai
Hujan malendo diranah bayiag
Mangko tarandamnyo lubuak kumpai

Sadang bakayuah rumah tarandam
Bakirim banci pasang di lawuik
Manyorak urang di ranah Agam
Banjirlah naiak ka ateh bukik

Gunuang singgalang raso mangigia
Lereng marapi kuyuik jo basah
Mangko jam gadang larek bapikia
nyampang sianok runtuah kabawah

Lambah anai babuai rusuah
Kirim galodo nan kamuaro
tapian mandi baayia karuah
timbo kok anggan kamanyawuak nyo

Bukik Tui tagak tatagun
babisiak bakeh padang panjang
santano lereang maluncua turun
alamaik ratok lamo ba ulang

Limo puluah kota apo tajadi
Payokumbuah bapayuang gabak
Banjir taganang nan di suliki
Ranah limbanang bagayuang sabak

Sadang nyo larek di agak agak
Tadanga rarau di tanah data
Magko takajuik danau singkarak
Ranahnyo solok mambari kaba

Batusangka ba hujan gadang
Basahi atoknyo pagaruyuang
Gonjoang taisak mato balinang
Dilapeh pandang sabalik kampuang

Tanjuang bonai mamakan korban
Lintau tuo lah banjir bandang
Bak abih dayo urek surian
Dibaok gurun luruah jo tumbang

Nyatolah kini apo tajadi
Minangkabau di kuruang hujan
Banjir jo longsor bajadi jadi
Maluluah lantak kampuang halaman

Hilang tanago tunggua baringin
tanah takikih di giriak hujan
ditahan juo raso tak mungkin
Kampuang jo banso manjadi korban

Surau jo balai abih Tarandam.
Gonjoang tak lai manjulang tinggi
Rangkiang manggigia nan jo mandamam
kamalah ubek ka Ruyuang cari

Ladang jo parak manjadi tabek
labuah jo laman lah jadi sawah
ulah dek dandam hujan nan labek
karano gabak talulua sumpah

tidolah sanang ikan jo baluik
dapek baranang sinan kasiko
nyampang tabaok badan ka lawuik
didalam ayia kamati juo

Balam lah cameh didahan tinggi
sayok lah barek dek basah kuyuik
dek Gatah Pikek Bialah Mati
Pado Tasangkuik di Lukah Anyuik

Nan Anyuik Anyuik lah sudah
Kamalah badan ka ayia bao
antah takubua di dalam lurah
disinan mayik ka bapusaro...

O..alam elok Sudahi
baok lah hujan baliak kalawuik
Nan ba atah Bia di tampi
nan lah taserak kakami kawuik

Tuhan Kuaso Nan Punyo dunia
Barilah Tahu kapado kami
santano iko bantuak bencana
akibaik kami lah lupo diri.......
#Ya Allah..jauhkan kami dari segala musibahmu...Aamiin.

(YOVI OTTERA)
DANDAM ALAM NAN TAK SUDAH
(Di hilia Pasang lah berang,dimudiak gunuang marabo)
Astagfirullah al adzim Ya Allah
Badantang si Patuih tungga
di salo labek hujan tacurah
malamdo padang kota tercinta

langsuang tagarik tangan nan ko
dalam gurindam batuangkan
apokah iko tando tando
alam bana nan bapasan

bakacamuak gabak dilangik
angin datang balimbubu
alam lah indak dapek bakarik
mangko bancano acok batamu

lapehlah pandang ka sulawesi
lah nyato alam mambaok dandam
gambo datang batubi tubi
palu lah luluah lantak jo radam

Lurah dalam lah jadi guguak
bukik nan tinggi lah jadi ngarai
tanah taban lereang pun ambruak
takubua mayik umpamo bangkai

sadang maratok marendo cameh
alam bakirim gampo juo
umpamo banci nan alun lapeh
rumah kajadi tanah pusaro

dibawah tanah lah ratak
di ilia ombak mamburansang
dimudiak kapundan lah manyalak
di ateh gabak sato berang

Gunuang Soputan kini mamakiak
abu vulkanik tinggi mambubuang
cando takapuang ilia jo mudiak
kamano lai tampek balinduang

nympang manyasak paruik bumi
bareknyo dandam alam rayo
lah samo kiamat katajadi
sulawesi lah kabinaso

Oh tuhan nan punyo bumi
apolah salah nan ta amalkan
mancaliak apo nan lah tajadi
manggigia raso suluruh badan

Ringankan juo langkah kami
ringankan tangan nan baragiah
Kami di minang sangaik paduli
batin maratok taraso padiah

Alun batamu mayik nan hilang
disalo taban gaduang tinggi
nan iduuik bacakak jo galang galang
labiah paduli mancari nasi

kok lai ado bantuan tibo
lah dulu abih di jarah urang
tapakai sudah hukum rimbo
lapehkan untuang surang surang

kok indak bana tabaok diri
sabarih doa kirimkan juo
di angkek tangan tinggi tinggi
baliakkan kami bak samulo

Kok ado doso indak ta ampun
laku parangai nan tabuek
kabakeh tuhan pintak di puhun
laku parangai lah banyak sasek.....

(Yovi Ottera)
#Doa UntukMu Wahai Saudara kami....Jeritanmu adalah ratapan kami.....

Minggu, 14 Oktober 2018

GURINDAM BANCANO
Buah Ranuangan ...
DONGGALA RARAK PALU LAH LULUAH
(Kuyuik Kain Panyeka Tangih)
Hanyo doa dapek dipintak
kabakeh tuhan maha kuaso
ateh apo nan alah tampak
manimpo sanak sudaro kito

Alun kariang luko nan lamo
sakian hari baru babilang
Lombok rarak di ganyang gampo
NTB luluah centang parenang

Guncangyo sampai ka sulawesi
Negri Sumbawa ratak rangkah
Sampai maratok gunuang rinjani
Jan sampai rTaban puncak kabawah

Kini lah nyato apo tajadi
Alam nan alun pueh jo berang
Malipek tanah di paruik bumi
Sulawesi tengah nan nyo goyang

Jumaat siang 28 september
Tanah donggala lah bagoyang
Di oyak gampo 6 skala richter
Panik malando alang kapalang

Sadang dibaluik tangih jo cameh
Kajuik nan alun nyato hilang
Berangnyo alam alun lai lapeh
Mangirim gampo labiah gadang

Kota palu kini badarak
Sado tatagak dibaok rubuah
Jalan rangkah gaduangp un rarak
Di oyak gampo tujuah koma tujuah

Sadang batukuak takuik dihati
Taluak palu mambaok pasan
Pantai Talise kaba tsunami
Bak dandam tido bakasudahan

Karang lah nyato indak badayo
Pasia lah cameh manatok riak
Galombang tibo tundo batundo
Agak jo apo Tabanduang Tidak

Ayia Lawuik kini malimbak
Manyisia puiang raruntuhan
Mambasuah darah nan taserak
Ma irik mayik bagalimpangan

Mangko manjadi buah tangih
Ibaraik luko nan takuyak
Dalam kapalo alun takikih
Katiko ranah bundo lah rarak

Bisuak sambilan tahun bajalan
Nagari kito di oyak gampo
30 sebtember 2009
Tanah di siram darah jo nyao

Mangkonyo kito mandulang cameh
Palu lah luluahgampo tsunami
Ibaraik ramuak tanahnyo Aceh
Dimaso silam nan tajadi

Raso di dado samakin dalam
Baa trauma nan tabuek
Dibatin bana alah tatanam
Tumbuah mancakam bakcando urek

Tuhan Kuaso nan punyo dunia
camehnyo kami danga dangalah
lah indak talok kami mandanga
samakin banyak korban batambah

Sadang mancaliak kaba tarantang
Didalam tipi Palu lah rarak
donggala luluah centang parenang
Di Minangkabau Kami tasabak…..
#Dangau Baseo 29 September 2018
(Yovi Ottera)
#Doa untuak dunsanak sa iman kito di Palu dan Donggala..smoga dibarikan ketabahan ma adok-I Ujian jo Musibah Ko…Aamiin..

MANYIMAK