RATOK CARANO USANG
(Rindu kabakeh Siriah Langkok)
dangalah Ratok carano usang
dalam lamari sajo talatak
Rindu kabakeh Siriah jo pinang
babungkuih rancak kain dulamak

balangkok langkok dalam carano
dulu basanjuang kato sambah
dilingkuang duduak urang basamo
sabalun siriah urang kunyah

Dalam sambah balewakan
kajadi simbol pacahnyo alek
dikato sidang jo pamohonan
mamapek cupak nan lah tabuek

Hijau nyo siriah baraso padeh
Kuniangnyo pinang bialah kalek
dalam carano kasiah ba uleh
indak kamungkin balapeh kabek

Gambia nan Coklat bialah paik
sadah nan Putiah taraso masin
didaun siriah arek balilik
bacarai raso indak kamungkin

Siriah pinang gambia jo sadah
Hijau Kuniang coklat jo putiah
asa Tacapai di Rono Sirah
disinan mangko kandak kabuliah

Mako dilicak siriah jo pinang
dipalik sadah sarato gambia
di dalam muluik samo baranang
elok kajadi pamerah bibia

sarinyo naiak paroman diri
lamaknyo tingga dirangkuangan
ganti ambalau baso-basi
silaturahimandai jo tolan

kok luluah bana di kunyah urang
ayia nan ado samo dilulua
manjadi sampah nan urang buang
lah raso sampai sagalo kawua

bia bacarai siriah jo tampuak
hijau nan indak babaliak lai
pado di tabiang tagayuik lapuak
kuniang di sangai dek mato ari

indak babaliak kuniang ka pinang
Haram manjadi upek caraco
padonyo busuak badan di batang
manjadi sarok ditapi rimbo

Gambia kok indak coklat lai
Sadah bacarai nan jo putiahnyo
asa tacapai cito nagari
palangkok jujuang dalam carano

Sajak baputa putaran maso
Budayo mulo di asak urang
lah tipih agak jo raso raso
kieh nan indak lai mambayang

harato labiah paguno kini
budayo cando lah ilang makna
hilang budayo baso jo basi
pitih lah acok kini panuka

bacarai siriah jo carano
gambia lah putuih kasiah jo pinang
sadah lah mabuak maratok ibo
adaik lah abih di asak urang

carano indak paguno lai
kini lah larek nan jo kuniangnyo
kusam takuruang dalam lamari
bakawan loyang jo piriang kanso

rindu kabakeh siriah salangkok
batutuik Rancak kain Dulamak
kini manjadi buahnyo ratok
manunggu maso lapuak talatak....